الصلاة
...عيد الاستقلال، مناسبة كبيرة، بحجم وطنّا... مناسبة كبيرة، بحجم أحلامنا... ويمكن، بالنسبة لكتار، تكون الخيبة كبيرة قدّا... الخيبة نتيجة واقع ما بيشبه كلّ الزقفات، ما بيشبه كلّ القصايد، ما بيشبه كلّ الأناشيد اللي بترتفع بهاليوم...
يا هالخيبة اللي ساكني كتار، إذا الكلّ عذرن معن، نحن ما عنّا عذر نخلّيكي تسألي فينا... ليش؟ لأنّو الولد ابن بيّو، وبيّنا نحن، عاش حياتو متّكل عالعناية الإلهيّة، ومسلّم... فكيف نحن ولادو بدنا نخاف، ونيأس، ونتركك، يا خيبة تسألي فينا؟ لأ نحن الطير اللي خلق تيطير بالسما ... والسما لبنان، وعين الربّ، وعنايتا ع السما، وع طيورا...
لإلِك، يا هالعناية الإلهيّة اللي وحدك سرّ أملنا، ورجانا، منصلّي، وعليك رح نضلّ نتّكي كلّما هبّت ريح بوطنّا، تنضلّ واقفين، تنضلّ متفائلين، تنضل، نحن ولاد الفال، كبار، وزغار كلنا لبنان! منصلّي...
باركنا نحن شيوخو، وشبابو، وأطفالو. تنضلّ كلّنا، وكلّ واحد وبالوزنات اللي عندو، نخدمك ، بأمل كبير أنّو بكرا، وع إيدينا، وبعقولنا، رح بكون أفضل، وأفضل.
بارك، جيشنا. حمي، من كلّ المخطار، تيبقى هوّي وحدو سيّد النصر، والكرامة، والأمان، والسيادة، تيبقى موحّد بكلّ طوايفو، ومذاهبو، رمز للبنان الواحد.
منصلّيلك على نيّة رئيس بلادنا وكلّ المسؤولين المدنيّين. نجّينا من الإسخريوطيّين اللي عم ببيعو وطنّا بكمشة فضة. عطين الحكمة، والضمير، تيكون همّن بس لبنان، ومش مصالحن ع حساب لبنان.
منصليلك، يا ربّ، ع نيّة لبنان الجمال، والخضار والميّ العذبة، تيرجع لبنان ، جبل الأطياب، اللي طبيعتو بتتنفّس صحّة، وعافية.
احفظلنا يا ربّ لبنان الرسالة القائم على العيش المشترك المبني على الانفتاح المثقّف.
إلك، يا ربّ، صلّينا... ووعد، يا لبنان، منّا، نحن يالفال كبار وزغار، رح نضلّ نصلّي بأمل، بإيمان، وبرجا، وبفرح، وبثقة، لأنّ هيك أبونا لو كان مطرحنا كان عمل.
ويا هالعناية الإلهيّة لإلك منسلّم لبنانا!
مقتطفات من كلمة مديرة المدرسة الأخت ماري يوسف
...يا عيلة ااـﭬـال، تحيّة وطنيّة، ونشالله وقفتنا الموحّدة اليوم، بتكون صورة مصغّرة عن لبنان الواحد، اللي كلنا منحلم فيه.
بالـﭬـال زغار وكبار، كلّنا لبنان
... وشو يعني " نحن لبنان؟ "، وشو يعني " أنا لبنان؟ ".
... أنا لبنان، يعني فكري، وإيديّ، وقلبي، وإيماني، هنّي قطعة هالسما.
أنا لبناني، وفكري قطعة هالسما، يعني أرضي مسؤوليتي، واحترامي لقوانينا هييّ صون لعلاقتنا كمواطنين...
أنا لبناني، وإيديّ قطعة هالسما، يعني أنا مواطن فاعل بمجتمعي، مواطن منتج. مواطن بيضحي، وبيخدم...
أنا لبناني، وقلبي قطعة هالسما، يعني... لبنان ساكن محبتي، ووجداني.
أنا لبناني، وإيماني قطعة هالسما، يعني أنا واثق إنّي قادر رجّع وطني أخضر، قادر رجّع وطني أحلى، قادر ملّي سلام، وخير...
أنا لبناني، يعني أنا بنتمي لقطعة هالسما. ومن دون إيماني، وإيديّي، وطموحي، وعلمي، وأخلاقي، وأمانتي، ولا ممكن هالقطعة السما تبقى وتدوم...
خلّونا اليوم، نبلّش بحالنا، ونعمل من مدرستنا، صورة مصغّرة عن وطنّا...